Trúargrundarlag
Meinigheitshúsið í Havn byggir arbeiði sítt á Bíbliuna og á fólkakirkjunnar 5 evangelisk-luthersku játtanarrit. Bíblian er Guds innblásta og heilaga orð og avgerandi myndugleiki fyri trúgv, lív og tænastu hins kristna.
Ápostólska trúarjáttanin
Vit avnokta Djevulin og allar gerningar hans og allan atburð hans.
Vit trúgva á Gud Faðir, hin alvalda, skapara himins og jarðar.
Og á Jesus Krist, Guds einborna Son, váran Harra, sum er gitin av Heilagum Anda, borin í heim av Mariu moy, pínslaður undir Pontiusi Pilatusi, krossfestur, deyður og jarðaður, niður farin til heljar, triðja dagin staðin upp frá deyðum, farin til himmals, sitandi við høgru hond Guds Faðirs, hins alvalda, haðani hann kemur at døma livandi og deyð.
Og á Heilagan Anda, eina heilaga almenna kirkju, samfelag teirra heilagu, fyrigeving syndanna, uppreisn likamsins og lív um aldur og ævir. Amen.
Nikenska trúarjáttanin
Vit trúgva á ein Gud, hin alvalda Faðir, sum hevur skapað himmal og jørð, allar sjónligar og ósjónligar lutir.
Og á ein Harra, Jesus Krist, Guds einborna Son, sum er føddur av Faðirinum fyri upphav tíðarinnar, Gud av Gudi, ljós av ljósi, sannur Gud av sonnum Gudi, føddur, ikki skapaður, av somu veru sum Faðirin, ið alt hevur skapað, sum fyri okkum menniskju og frelsu okkara er komin niður av himni og er vorðin hold við Heilagum Anda av Mariu moy og gjørdist menniskja, sum eisini okkara vegna er krossfestur undir Pontiusi Pilatusi, píndur og jarðaður. Triðja dagin risin upp samsvarandi Skriftunum og farin til himmals, situr við Faðirsins høgru hond og skal koma aftur í dýrd at døma livandi og deyð, og á ríki hansara skal eingin endi vera.
Og á Heilagan Anda, Harran og lívgevaran, sum gongur út frá Faðirinum og Syninum, sum saman við Faðir og Syni verður tilbiðin og dýrmettur, og sum hevur talað við profetunum.
Og á eina heilaga, almenna (alheims) og ápostólska kirkju. Vit játta ein dóp til fyrigevingar syndanna og vænta uppreisn teirra deyðu og lívið í komandi heimi.
Amen.
Tey 10 boðini
1 Tú mást ikki hava aðrar Gudar
2 Tú mást ikki misbrúka navn Harrans, Guds tíns
3 Minst til at halda hvíludagin heilagan
4 Æra faðir tín og móður tína
5 Tú mást ikki sláa í hel
6 Tú mást ikki dríva hor
7 Tú mást ikki stjala
8 Tú mást ikki bera falskan vitnisburð ímóti næsta tínum
9 Tú mást ikki girnast hús næsta tíns
10 Tú mást ikki girnast konu næsta tíns, ikki húskall ella arbeiðiskonu hansara, ikki fæ hansara ella nakað, sum næsti tín eigur